by Grupo 765 receitas de biscoitos caseiros que saben a avoa
Quen pode resistirse ao arrecendo dun biscoito acabado de facer?
Se hai unha sobremesa que cheira a infancia, a tardes na cociña e á casa da avoa, ese é o biscoito. Cada receita garda a súa historia: a desa man experta que medía “a ollo” e ese toque especial que o facía único e irrepetible. O biscoito é unha herdanza deliciosa que pasa de xeración en xeración… e que nunca pasa de moda.
Hoxe é un día perfecto para acender o forno e preparar unha desas receitas de biscoito que saben a fogar. Déixamosche 5 clásicos de sempre, fáciles, caseiros e cheos de sabor.
Biscoito de iogur (o do vasito)
O máis clásico, o máis sinxelo e o máis infalible.
Este biscoito de iogur é o de toda a vida: mides todo co vasito e sempre sae ben. Ten un sabor suave, esponxoso e é perfecto para mollar en leite ou café. Ideal para principiantes e perfecto para personalizar, engadindo algunha froita, froitos secos ou chocolate.
Ingredientes:
1 iogur natural (125 g); 3 ovos Demillo; 2 medidas de iogur de azucre; 1 medida de iogur de aceite de xirasol ou de oliva suave; 3 medidas de iogur de fariña; 1 sobre de fermento en po (tipo Royal, 16 g); Reladura de 1 limón (opcional); Unha chisco de sal
Preparación:
Prequenta o forno a 180 °C. Nun bol, mestura o iogur, o azucre, o aceite, a fariña e o fermento. Engade os ovos e mestura ben ata obter unha masa homoxénea e sen grumos. Incorpora a reladura de limón e a chisco de sal, e integra. Verte a masa nun molde engraxado ou forrado con papel vexetal. Fornea durante 35–40 minutos a 180 °C, ata que ao picar cun pauciño saia limpo.
Trucos da avoa:
- Engade pingas de chocolate, noces ou anaquiños de mazá para darlle un toque diferente.
- Se usas iogur de limón, potenciarás o sabor cítrico do biscoito.
Biscoito de limón (o máis fresco)
Fresco, esponxoso e cun aroma que enche a cociña.
Este biscoito de limón é outro clásico dos clásicos: doado, caseiro e con ese puntiño cítrico que o fai irresistible. E se te animas, podes probar a súa versión con lima e limón para darlle aínda máis personalidade.
Ingredientes:
3 ovos Demillo; 200 g de azucre; 100 ml de aceite de xirasol (ou de oliva suave); 1 iogur natural (125 g); 1 limón (reladura e zume); 200 g de fariña de trigo; 1 sobre de fermento químico; un chisco de sal
Opcional: azucre glas ou glaseado de limón para decorar
Elaboración:
Prequenta o forno a 180 °C. Bate os ovos co azucre ata que a mestura estea espumosa. Engade o aceite, o iogur, o zume e a reladura de limón e mestura ben. Incorpora a fariña, o fermento e o sal peneirados. Verte a masa nun molde engraxado ou forrado e fornea durante 40–45 minutos. Unha vez frío, podes decorar con azucre glas ou glaseado de limón.
Trucos da avoa:
- Ralla só a parte amarela do limón (a branca amarga).
- Baña o biscoito cun almibre de limón ao sacalo do forno para máis zume.
Bica galega (o noso biscoito de nata)
A raíña galega dos biscoitos.
Coa súa miga densa, o seu sabor suave e esa codia azucrada, a bica é un clásico que cheira a festa, a forno de aldea e a sobremesas en familia. A súa textura e sabor convértena nunha receita imprescindible para quen busca un biscoito con carácter.
Ingredientes:
4 ovos (a temperatura ambiente); 400 g de azucre; 200 ml de nata líquida para montar (mín. 35% MG); 200 g de manteiga cocida de vaca (ou manteiga derretida e arrefriada); 400 g de fariña de trigo; 1 sobre de fermento químico; un chisco de sal; azucre para espolvorear por enriba
Elaboración:
Prequenta o forno a 180 °C e forra un molde rectangular. Bate os ovos co azucre ata que a mestura branquexe. Engade a nata e a manteiga derretida mesturando todo ben. Incorpora a fariña peneirada xunto co fermento e o sal. Verte a masa no molde e espolvorea xenerosamente azucre por enriba. Fornea durante 45–50 minutos, ata que a superficie estea dourada e crocante.
Trucos da avoa:
- Usa manteiga cocida galega auténtica para un sabor máis tradicional.
- A textura mellora ao día seguinte: podes facela con antelación.
Biscoito marmolado (veta de vainilla e chocolate)
Esponxoso, vistoso e delicioso.
Outro deses clásicos de avoa para as merendas con leite e as tardes sen présa. E con ese toque máxico que se consegue ao cortalo e descubrir os remuíños de chocolate e vainilla.
Ingredientes:
4 ovos; 200 g de azucre; 100 ml de aceite de xirasol ou manteiga derretida; 200 ml de leite; 250 g de fariña de trigo; 1 sobre de fermento químico; 1 culleradiña de extracto de vainilla; 2 culleradas de cacao puro en po (sen azucre); un chisco de sal
Elaboración:
Prequenta o forno a 180 °C. Bate os ovos co azucre ata que a mestura estea espumosa. Engade o aceite (ou manteiga) e o leite e mestura ben. Incorpora a fariña peneirada co fermento e o sal. Divide a masa en dúas partes: a unha engádelle a vainilla, á outra o cacao. Verte as masas no molde en capas alternas e fai remuíños suaves cun pauciño. Fornea durante 40–45 minutos.
Trucos da avoa:
- Non remexas demasiado para que non se mesturen as cores.
- Para un debuxo máis bonito, verte as capas sempre no centro do molde.
Biscoito de noz (o crocante irresistible)
Esponxoso por dentro, co toque crocante das noces.
Un biscoito suave, aromático e con ese punto de froitos secos que o fai especial. É perfecto para almorzos, merendas ou como sobremesa de fin de semana.
Ingredientes:
3 ovos; 200 g de azucre; 150 ml de aceite de xirasol ou manteiga fundida; 125 ml de leite; 200 g de fariña de trigo; 100 g de noces anacosadas; 1 sobre de fermento químico (16 g); 1 culleradiña de canela (opcional); un chisco de sal
Opcional: azucre glas ou cobertura de chocolate negro
Elaboración:
Prequenta o forno a 180 °C. Bate os ovos co azucre ata que a mestura branquexe. Engade o aceite (ou manteiga) e o leite, mesturando todo ben. Incorpora a fariña peneirada co fermento, o sal e a canela. Engade as noces anacosadas, reservando algunhas para decorar. Verte a masa nun molde engraxado e decora coas noces por enriba. Fornea durante 35–40 minutos. Deixa arrefriar e decora ao gusto.
Truco da avoa:
Tosta lixeiramente as noces antes de engadilas: realzan o sabor e quedan máis crocantes.
Biscoitos clásicos… cun extra
Os biscoitos de sempre tamén poden sorprender. Para os que se atreven con algo máis: un toque cítrico, froita, unha textura distinta… aquí tes algúns biscoitos con alma de avoa e espírito curioso.
Biscoito de millo, limón e augardente