Prepárate uns deliciosos e saudables ovos poché en 1 minuto. Rápidos e sen manchar máis utensilios dos necesarios. Se sempre se che resistiron, esta é a receita definitiva que che fará amalos.

Unha receita rápida e doada

Desde Demillo sabemos que o tempo é ouro. Por iso, traémosvos esta receita exprés perfecta para as mañás preguiceiras de xaneiro. E para quen lle ten medo á famosa explosión do ovo poché, podedes baixar o escudo: esta receita ten o certificado de seguridade que necesitades.

Que necesitas para facelo?

Necesitaremos un bol apto para microondas, auga, vinagre de viño ou de mazá e un ovo mediano.

Paso a paso para o ovo poché ao microondas

Primeiro, enche un bol apto para microondas con auga quente, á temperatura máxima que saia da billa. Calcula aproximadamente 3/4 do recipiente.

Engade un chisco de vinagre (podes medilo con dous tapóns dunha botella pequena de plástico). O vinagre axuda a que a clara coagule máis rápido e de maneira uniforme.

Escolle un ovo fresco mediano. Canto máis fresco sexa, mellor, xa que a clara estará máis firme e manterase unida.

Cáscao e vérteo con coidado no bol. A continuación, pincha a xema cun coitelo fino para liberar a presión e evitar que se acumule (e remate explotando). Tamén é importante asegurarse de que a xema quede completamente mergullada; se non é así, corríxeo antes de cociñar.

Quenta no microondas durante 40 segundos a 900 W. Ten en conta que cada microondas é diferente, así que pode que necesites axustar o tempo. O mesmo ocorre co tamaño do ovo: canto máis pequeno, menos tempo.

Pasado este tempo, fai unha pausa e comproba que o ovo comeza a coller cor e forma. Vólveo introducir no microondas en tandas de 10 segundos ata que a clara estea completamente callada. Quenta e abre para comprobar; así evitarás que quede cru ou que estoure a xema.

Por último, saca o bol e retira o ovo coa axuda dun escorredor.

Listo! Un ovo poché rápido e sen complicacións, en apenas un minuto.

Lembra que, como en calquera receita, tamén hai que tirar de ollómetro. Non desesperes: a práctica fai ao mestre e este método merece a pena!

Ideas para acompañar un ovo poché

Deixámosvos varias receitas moi ricas para acompañar un ovo poché!

Ovo poché con cogomelos e crema fina de pataca: unha receita gourmet para comer na casa, co ovo como protagonista.

Ovos flor con gulas e lagostinos: se estás a buscar un gran entrante, aquí o tes. Ademais, é unha boa receita para facer con nenos. Quedarán encantados con estes ovos poché en forma de flor!

Lentellas guisadas con chourizo e ovo poché: un prato tradicional cun toque de ovo boísimo.

Ovos benedictine: unha das mellores formas de comezar o día con enerxía.

É saudable o ovo poché?

Por suposto! É unha opción moi nutritiva, baixa en graxas e en calorías. Ao prescindir do aceite na súa preparación, convértese nunha opción moi saudable para gozar da túa cantidade diaria de ovos.