Cando fai sol podemos dar por feito que as nosas necesidades de vitamina D están máis que cubertas. Pero non é así. As cremas protectoras (tan necesarias para evitar problemas importantes de pel) ou vivir en zonas con déficit de vitamina D fan que o recomendable sexa combinar unha exposición solar diaria moderada coa inxesta de alimentos ricos en vitamina D, como os ovos Demillo.

E é que o sol é a principal fonte desta vitamina, pero non sempre abonda. Nin sequera nos meses de máis luz.

Para que necesitamos a Vitamina D?

Adoitamos asociar os ósos fortes ao calcio, pero o calcio, por si só, non chega a onde ten que chegar. A Vitamina D é a que regula canto calcio e canto fósforo absorbe o noso corpo, e por iso contribúe a que ósos e dentes se manteñan sans.

Ademais, axuda ao funcionamento normal do sistema inmunitario e ao mantemento da función muscular. Dito doutro xeito: é a que abre a porta para que o resto entre.

Por que nos pode faltar Vitamina D aínda que faga sol?nque haga sol?

Empecemos pola hora. A radiación UVB, a que activa a produción de vitamina D, aperta entre as 12:00 e as 15:00. Pero esas son tamén as horas nas que a Academia Española de Dermatoloxía recomenda afastarse do sol: son as máis perigosas para a nosa pel e a nosa saúde, porque os raios ultravioleta caen con maior intensidade e verticalidade.

E logo está a vida de interior. Sexa a época do ano que sexa, a maioría pasamos case todo o día baixo teito, e o cristal das ventás bloquea a radiación UVB. É dicir, que o sol que entra pola ventá da oficina non nos serve.

É verdade que enchemos as reservas para todo o ano?

Esta é a crenza máis estendida de todas: a idea de que os meses de máis sol nos deixan o depósito cheo para o resto do ano. Pois resulta que non funciona así.

É certo que a vitamina D é liposoluble e que se acumula no tecido graxo e no fígado, pero non en cantidade abondo para cubrir os meses seguintes: vaise eliminando en cuestión de semanas. Por iso os especialistas insisten en que é máis razoable unha achega continuada ao longo de todo o ano ca unha «sobredose» puntual, sobre todo se esa sobredose se busca a base de expoñerse ao sol máis do recomendable.

Así que non hai un depósito que se encha dunha vez e dure meses. A vitamina D hai que achegala cada día, en xaneiro e en agosto.

O ovo, o teu aliado de Vitamina D todo o ano

O ovo é unha das poucas fontes naturais de vitamina D e, ademais, é un alimento que sempre temos a man na casa. Concretamente está na xema, e un só achega case o 20% da cantidade diaria recomendada.

Pero isto non é todo! A clara achega proteína de alto valor biolóxico, que axuda a manter a masa muscular e fai a comida moito máis saciante. Por iso o interesante é tomar o ovo enteiro, non media parte.

E para aproveitar ao máximo a vitamina D do ovo, segue estes consellos: come a xema enteira, que xa che contamos que é onde está, e cociña o ovo fervido, escalfado ou á prancha. Segundo un estudo, cando cocemos o ovo absorbemos o 90% das súas proteínas e das súas vitaminas e minerais.

Sempre dicimos que o ovo é un súper alimento, e ségueo sendo en calquera época do ano. Se queres afondar na relación entre o ovo e esta vitamina, aquí contámoscho con máis detalle.

Por que en Galicia temos déficit de Vitamina D

Se vives en Galicia, hai dous motivos máis para prestarlle atención. O primeiro é a latitude. Galicia está a uns 43º norte, e canto máis lonxe do ecuador esteamos, menor será a intensidade dos raios UVB no inverno, o que frea ou anula a síntese natural desta vitamina. A partir dos 35º ou 37º de latitude, a pel apenas a produce desde finais do outono ata principios da primavera.

O segundo é o ceo. Aquí a nubosidade non colle vacacións: Santiago de Compostela ronda os 147 días de sol ao ano, fronte aos máis de 300 de cidades como Alacante ou Málaga. Menos días despexados significan menos oportunidades reais de sintetizala, en calquera estación.