Esta receita de aproveitamento colocouse no top da nosa gastronomía pola súa cremosidade interior e a súa gran versatilidade. Pero, ¿como se fan unhas croquetas perfectas? Como sempre, a avoa ten as claves. Desde como conseguir unhas croquetas cremosas por dentro ata como rebozalas e como lograr que queden crocantes por fóra. Apunta os seus 9 trucos.

¿Como conseguir unhas croquetas cremosas por dentro?

A clave está na bechamel, e para conseguir a textura perfecta hai 3 trucos fundamentais:

1. Emprega a proporción axeitada: a mesma cantidade de manteiga ca de fariña e 10 veces a cantidade de leite.
2. Cociña a fariña na manteiga derretida uns minutos para que non saiba a cru… pero sen torrala demasiado para que non se queime.
3. Engade o leite pouco a pouco, sen deixar de remexer, e traballa a bechamel un mínimo de 15 minutos ata conseguir unha textura lisa (sen grumos), espesa, que se desprenda do fondo, pero cremosa. Despois engade os ingredientes do recheo e rectifica de sal e pementa.

¿Canto tempo debe repousar a masa das croquetas?

É outra das partes fundamentais se queres saber como facer unhas croquetas perfectas. Cando teñas a masa das croquetas lista, segue estes pasos:

1. Cóbreas con papel film tocando a bechamel, para que non se forme codia
2. Déixaas repousar na neveira un mínimo de 6 horas, aínda que o consello da avoa é deixalas un día enteiro. Isto axudará a que se solidifiquen correctamente e sexa máis doado darlles forma ás croquetas e logo fritilas sen que se desfagan.

 

¿Como rebozar as croquetas?

Chegamos ao noso momento favorito, o rebozado, onde a calidade e a cor dos ovos Demillo axudarán a conseguir ese toque diferencial. Pero ademais de escoller ingredientes de calidade, ten en conta isto: o rebozado da avoa inclúe tres pasos: fariña, ovo ben batido e pan relado. Nesta orde.

 

¿Por que se rompen as croquetas ao fritilas e como evitalo?

Seguro que che pasou máis dunha vez: á hora de fritir as croquetas, o rebozado ábrese e o interior derrámase na tixola. Pero dámosche os trucos definitivos para evitalo e conseguir que as croquetas queden crocantes por fóra e cremosas por dentro:

1. Unha vez rebozadas as croquetas, déixaas repousar de novo uns 30-60 minutos na neveira, para que a capa exterior se adhira mellor e quede máis consistente.
2. Fríteas en aceite de oliva quente, pero sen que fume. A temperatura do aceite é moi importante: se está tépedo, quedarán graxentas; se está demasiado quente, podes queimar o exterior sen que o interior se cociñe. A temperatura ideal é duns 180º.
3. Non fritas moitas croquetas á vez. Pon 4 ou 5 croquetas en cada tanda, para que non baixe a temperatura do aceite.

7 receitas de croquetas caseiras

Agora chegou o momento de poñer a proba todos estes trucos e preparar unhas croquetas coas que namorar ata á túa avoa. Déixamosche as nosas 7 receitas favoritas (pero non as únicas) coas que poderás adestrar a cociña da avoa:

• Croquetas de ovo frito e chourizo
• Croquetas de gambón e ovo cocido
• Croquetas de espinacas e xamón
• Croqueovos recheos de Frabisa
• Croquetas de queixo de tetilla
• Croquetas cremosas de polo
• Croquetas de chocolate